4 أكتوبر 2007

رووووم كفاية


فريدم على الميك : الفساد، وأنفلونزا الطيور، والأحزاب كل شيء هباب في هباب. بحبك يا بلدي على التيسكت : وتفتكر حفيد جمال هيحكم .
يتجاهل فريدم ما كتب على التيكست بعدما توقف لوهلة، استغلها بحبها ليقفز على الميك .
يقفز بحبها على الميك مغنيا : أنا بحب بنت بلادي أموت أموت عليها دي .
الأدمن بغضب : انزل ياض من على الميك وخد ريد دوت ، وخليك اسمع جايز تستفيد ، انتم اللي جايبنه لورا .
بحبها بسرعة على التيسكت قبل أن يباغته الأدمن مصري بالريد دوت يكتب: هزيها براحة براحه تلاقيها على طول مرتاحة ، هزيها بشويش بشويش ، خلي الشعب يعيش .
الأدمن : سوري يا فريدم خد الميك كمل كلامك .
فريدم : شكرا مشي التيرن مفيش مشكلة .
مصري : الميك معك يا مغترب .
مغترب : والله يا جماعة كلام الأستاذ حكيم عجبني جدا ، مصر محتاجة راجل زي عبد الناصر يعيد أمجادها .
ثائر بسخرية يكتب: ايوه عشان يعلمنا العزة والكرامة، انزل ياض من على الميك ، بلاش جهل .
يقفز الأدمن مصري على الميك قائلا: أسف يا مغترب هشيل عنك الريدوت ، آخر تحذير ليك يا ثائر ، كل واحد يقول رأيه بحرية .
ثائر: ممكن الميك بليز . التيرن كان عليه أساسا والميك وقع مني والله .
مصري يلمح نور العيون : أهلا يا نور نورتي الروم .
نور العيون على التيكست : أهلا بيك .
ثائر : الميك بليز.
الأدمن : الميك ليك يا مغترب كمل كلامك.
على الخاص يكتب بحبها لنور العيون رسالة من ثلاث كلمات : "بحبك يا بت" . ويتبعها بأخرى "أنا ضفتك في القايمة" . نور العيون : اخرس ..
بحبها : بلاش تعيشي الدور دا يا نور، كل يوم بشوفك في روم الأدلت .
نور مندهشة بحق : يا أستاذ بحبها أكيد حضرتك غلطت في النيك نيم ، أنا مبدخلش إلا روم كفاية فقط .
بحبها : طب ممكن نتعرف.
نور العيون : آسفة .
بحبها : طب ليه بس يا جميل .
نور : من فضلك .
بحبها : خلاص عشانك يا مصر يا بانيه الهرم هسكت .
نور: ايقونة ابتسامة .
بحبها يظن أن الفرج قادم، وان البنت لانت على حد تعبيره، وربما راودته شكوكه أنها هي هي نور العيون التي تدخل روم الأدلت .بحبها : طب عندك كم سنه ؟ تتجاهله نور العيون حتى مل وانصرف ، بعدها بلحظات غادرت الروم أنا الآخر .

هناك 20 تعليقًا:

dr.Roufy يقول...

البالتوك دا عالم تاني
ورغم خبرتي المديدة على النت
:)

الا أني عمرى ما تعاملت مع الرومز دي
مش عارفة ليه بس يمكن باقول الى نعرفه أحسن من الى مانعرفهوش

بس البوست جميل ونقلت بيه لقطات..واضحة

تحياتي

ابو احمد يقول...

الاستاذ اسامه
مدونتك جميله وروحك خفيفه فيها حس فنان سعدت بهذه الزياره التى ستتكرر باذن الله
تحياتى

اسامة يس يقول...

شكرا يا دكتورة على المرور ... والبالتوك هو الاخر عالم فسيح في فضاء النت ... ومليئ بالتناقضات ...
خالص تحياتي

اسامة يس يقول...

الاجمل هو مروركم العطر يا ابو احمد على مدونتي ... ويسعدني جدا تكرار الزيارة ...

Desert cat يقول...

انا جربت ادخل البالتوك ده تقريبا مرة وكانت هى المرة
ده انا حتى نسيت اليوزر نيم والباسورد
بس بالفعل البوست معبر عن حقيقه واقعه بالفعل للاسف
وما اكثر الشباب الفارغ عقليا اللى كل همه
ريكو ودينا ولا سعد
ربنا الهادى
تحياتى على البوست القيم

مدحت محمد يقول...

اولا ميرسى على تعليقك فى مدونتى
ثانيا
انا برضه عمرى مادخلت البالتوك
بس الحوار لذيذ اوى
والبوست عشرة على عشرة
تحياتى

اسامة يس يقول...

شكرا على مروركم يا قطة الصحراء والحمد لله ان البوست عجبك ...
خالص التحية

اسامة يس يقول...

الاخت الكريمة ضحى .. الشكر ليك انت على مروركم وتعليقكم ..
خالص التحية

Unknown يقول...

سؤال بس

أنت عرفت منين اللي جرا ع الخاص بين نور العيون و بحبها؟
:))

تحياتي بوست جميل

klmat يقول...

بوست جميل واسلوب فريد
لخصت فيه اوضاع كتير
ببراعه
كل سنه وانت طيب
تحياتى لك

اسامة يس يقول...
أزال المؤلف هذا التعليق.
اسامة يس يقول...

الكريمة فنان فقير ... سعدت بمروركم ... عرفت منين عرفت منين امممممممممم اكيد عرفت من حد فيهم .. هههههههههه...

اسامة يس يقول...

الكريمة كلمات /شكرا على مروركم الكريم، وانت بالصحة والسلامة...
خالص تحياتي

ملك الكبدة يقول...

البالتوك ده من خبرتي المتواضعة بالنت ملجأ لمجموعة من المرضى النفسيين
و تحس بترتيبات معارك
و يوم موش عارف ايه مناظرة بين موش عارف القسيس مين و الشيخ مين و اللي يخسر يتخلى عن دينه
طبعا في مزايا بس احنا حولنا الموضوع لمسلم و مسيحي و كل افاتنا النفسية
و لكن و خد بالك من ولكن دي لانها هتحسسك اني بتكلم بجد شوية

اذا ظهرت حركة معارضة جديدة و ررومات بتقول كفاية و تعارض ماشي ولو ان كل اللي اخدت بالي منه ناس بتحلو على بعضها

البلوج حلو وموش لازم يكون انتاجك كتير كدة سعدت جدا بدخول مدونتك و مستني زيارتك يا برنس

درش يقول...

البالتوك ملتقى جميع الجماعات السياسية في العالم كله.
لو فيه جماعة سياسية عاوزة تعمل دعاية لنفسها تروح ع البالتوك.
البالتوك مش للشات ، أنا بأحس إنه مرشق مخبرين و بتوع مخابرات من جميع أنحاء العالم
لا تدخلوا البالتوك

اسامة يس يقول...

الكريم ملك الكبدة ...
صحيح البالتوك نوع من تفريغ الكبت ... وجعجة عبر الاسلاك .... لكنه مثال لواقع نعيشه ... لأزمات نحياها ...
سعدت بكم ضيفاً عزيزاً ..

اسامة يس يقول...

البالتوك اكيد فيه مخبرين ومخابرات ... وجس نبض لما هو ات وكل شيء .... وسيلة اعلامية زي اي وسيلة بتستخدمها اي جهه ..... الغريب في الامر يا درش العزيز ان الوعي وحده لم يعد كافي لأن نستفيق ...
خالص تحياتي

Mahmoud يقول...

البالتوك فيه سمُ قاتل..

التعليقات أعلاه توحي بكده..

أُكتب بالرصاص يقول...

الحمد لله البالتوك أصبح للأعضاء فقط ..

يعني اللي عايز يروح له برجليه ..يتحمل أذاه

وعلى راي اللمبي
اللي يحضر العفريت ..يتحمل أذاه

تحياتي لك

أسماء علي يقول...

البالتوك ومصايبه يااسامة
انا اول مادخلت مدونتك دورت على النص ده مخصوص
ماعرفش حسيت اني عايزة اقرا حاجة تفوقني من الرومانسية وترجعني للي بيحصل ف الدنيا
او ف البالتوك يعني ..اهه كله هجص ف هجص
وبلد ماشية بالهجص وفقط
اسلوبك طبعا متمكن حتى ف نقل تلك الصورة الغريبة ..بس اجدت ف نقلها ..