حسبة برمة

انا خايب اوي في الرياضيات بس والله لما كبرت حبتها ، وقلت لو استدبرت من امري ما استقبلت ... يعني بالبلدي لكنت درستها باتقان وخصوصا الهندسة عشان ميحصليش اللي انا فيه حاليا... .. وعندي عقده من الاعداد الفردية خصوصاً ... فأي حد يطلب مني اضرب عدد فردي في عدد اخر او اقسمة او اجمعة بتنشن على طول وابلم .. سعات بعمل نفسي بحسب بس بجد بكون اكيد بفكر في اي شيء الا اني احسبها ... يعني تخيل نفسك بتجمع 713+913 = انا والله بالنسبالي مشكلة ... او تضربهم او تقسمهم ... طبعا الاعداد الزوجية نفس المشكلة بس الفكرة اني بحاول معاها لانها ديما بتحسسني ان في امل فالعدد هيطلع زوجي في الاخر ... وكل اشويه بسمع كلمة هوه في ايه هيه حسبة (برمة) وكنت برددها ذي البغبغان لما حد يتلكع في فهم اي شيء طبعا مش رياضيات ... لحد في يوم لما واحد بيقول هيه حسبة ( برمة) رحت قايلة تعالى هنا هيه ايه حسبة برمة اساسا ... لقيته عارف ... قالي الموضوع وما فيه ان واحده ست من قرية في محافظة الغربية كانت ماشية وشايلة على راسها طبق مليان بيض ، راح واحد من غير قصد ماشي بعجله زقها وقع البيض واتكسر ... راحت اشتكته قالها يا ستي الحاجه من غير شكوى قولي كم عدد البيض وانا ادفع تمنه ... ردت وقالت:

انا كنت لما اقسمه كومين يتبقى بيضه

اقسمه تلت كومات يتبقى بيضة

اقسمة اربع كومات يبتبقى بيضه

خمس كومات يتبقى بيضة

ست كومات يتبقى بيضة

سبعة ميتبقاش

.....................................

طبعا وكان عايزني احسب عدد البيض ... وبعد يأس مدقع قلتله غلب حماري راح مجاوب ؟؟؟؟؟؟؟ تفتكروا تكون الاجابة ايه

عشان ابسطها البيض اقل من 500